Karitas valinn Samfélagsvefur Hugsmiðjunnar 2010
Á dögunum auglýsti Hugsmiðjan eftir umsóknum um Samfélagsvef Hugsmiðjunnar en einu sinni á ári gefum við fullbúinn vef til félagasamtaka sem vinna að þjóðfélagslega mikilvægum verkefnum.
Að þessu sinni varð Karitas, hjúkrunar- og ráðgjafaþjónusta fyrir valinu, en farin var sú leið að láta alla starfsmenn Hugsmiðjunnar kjósa milli þeirra umsókna sem bárust.
Karitas er hjúkrunar- og ráðgjafaþjónusta fyrir fólk með langvarandi sjúkdóma samkvæmt skilgreiningu Alþjóðaheilbrigðismálastofnunarinnar (WHO) um líknarmeðferð og umönnun langveikra. Þjónusta er veitt allan sólahringinn og endurgjaldslaust.
Markmið Karitas er að styðja við þá sem eru haldnir langvinnum sjúkdómum þannig að þeir geti betur tekist á við daglegt líf sitt þrátt fyrir þær breytingar og takmarkanir sem sjúkdómurinn hefur í för með sér.
Karitas mun fá að gjöf frá Hugsmiðjunni Eplica vefumsjónarkerfið, hönnun, forritun, uppsetningu og aðra vinnu sem þarf til að opna fullbúinn vef. Meðal samtaka sem áður hafa fengið vef af þessu tagi má nefna Götusmiðjuna, Íslandsdeild Amnesty International, Mannréttindaskrifstofu Íslands og fleiri.
Að endingu vill Hugsmiðjan þakka öllum þeim sem sóttu um styrkinn, en við fengum margar frábæra umsóknir og vonumst til þess að þeir sem ekki urðu fyrir valinu þetta árið sæki aftur um á því næsta.